Serat Wedhatama : Gambuh

48
Samengko ingsun tutur
Sembah catur supoyo lumuntur
Dhihin rogo cipto jiwo roso kaki
Ing kono lamun tinemu
Tondho nugrahaning Manon
49
Sembah rogo puniko
Pakartine wong amagang laku
Sucine asarono saking warih
Kang wus lumrah limang wektu
Wantu wataking weweton
50
Inguni uni durung
Sinarawung wulang kang sinerung
Lagi iki bongso kas ngetokken anggit
Mintokken kawignyanipun
Sarengate elok elok
51
Thithik koyo santri dul
Gajeg koyo santri brai kidul
Saurute Pacitan pinggir pesisir
Ewon wong kang podho nggugu
Anggere podho nyelemong
52
Kasusu arso weruh
Cahyaning Hyang kiniro yen karuh
Ngarep arep urub arso den kurebi tan wruh
Kang mangkono iku akale keliru enggon
53
Yen to jaman rumuhun
Toto titi tumrah tumaruntun
Bongso srengat tan winor lan laku batin
Dadi nora gawe bingung
Kang podho nembah Hyang Manon
54
Lire srengat iku
Keno ugo ingaran laku
Dhingin ajeg kapindhone ataberi
Pakolehe putroningsun
Nyenyeger badan mrih kaot
55
Wong seger badanipun
Otot daging kulit balung sungsum
Tumrah ing rah memarah
Antenging ati minongko
Angruwat ruweding batos
56
Mangkono mungguh ingsun
Ananging to sarehne asnafun
Bedao bedo panduk panduming dumadi
Sayektine nora jumbuh
Tekad kang podho linakon
57
Nanging to pakso tutur
Rehne tuwo tuwase mung catur
Mbok lumuntur lantraping reh utami
Sing sopo temen tinemu
Nugroho geming kaprabon
58
Samengko sembah kalbu
Yen lumintu ugo dadi laku
Laku agung kang kagungan Noropati
Patitis tetesing kawruh
Meruhi marang kang momong
59
Sucine tanpo banyu
Mung nyunyudo mring hardaning kalbu
Pambukane toto titi ngati ati
Atetep telaten atul
Tuladan marang waspaos
60
Mring jatining pandulu
Panduk ing ndon dedalan satuhu
Lamun lugu legutaning reh maligi
Lageane tumalawung
Wenganing alam kinaot
61
Yen wus kambah kadyoku
Sarat sareh saniskareng laku
Kalakone soko eneng ening eling
Ilanging roso tumlawung
Kono adiling Hyang Manon
62
Gagare ngunggar kayun
Tan kayungyun mring ayuning kayun
Bongso anggit yen ginigit nora dadi
Marmo den awas den emut
Mring pamurunging kalakon
63

Samengko kang tinutur

Sembah katri kang sayekti katur

Mring Hyang Sukma sukmanen saari ari

Arahen dipun kacakup

Sembahing jiwo sutengong

64

Sayekti luwih perlu

Ingaranan pepuntoning laku

Kalakuwan tumrap kang bangsaning batin

Sucine lan awas emut

mringulaming lama maot

65

Ruktine ngangkah ngukut

Ngikrt ngrukut triloka kakukut

Jagad agung ginulung lan jagad alit

Den kandel kumandel kukup

Mring kelaping alam kono

66

Kaleme mawi limut

Kalamatan jroning alam kunyut

Sanyatane iku kanyatan kaki

Sejatine yen tan emut

Sayekti tan bisa awor

67

Pamete soko luyut

Sarwo sareh saliring panganyut

Lamun yitno kayitnan kang mitayani

Tarlen mung pribadinipun

Kang katon tinonton kono

68

Nanging awas salah surup

Kono ono sejatining urub

Yeku urub pangarep uriping budhi

Sumirat sirat narawung

Kadyo kartiko katonton

69

Yeku wenganing kalbu

Kabukane kang wengku winengku

Wewengkone wis kawengku neng sireki

Ning siro ugo kawengku

Mring kang pindho kartiko byor

70

Samengko ingsun tutur

Gantyo sembah ingkang kaping catur

Sembah roso karoso wosing dumadi

Dadine wis tanpo tuduh

Mung kalawan kasing batos

71

Kalamun durung lugu

Ojo pisan wani ngaku aku

Antuk siku kang mangkono iku kaki

Keno ugo wenang muluk

kalamun wus podho melok

72

Meloko ujar iku

Yen wus ilang sumelanging kalbu

Amung kandel kumandel

Amarang ing takdir

Iku den awas den emut

Den memet yen arso momot

73

Pamoting ujar iku

Kudu santosa ing budhi

Teguh sarto sabar tawekal legaweng ati

Trimo lilo ambeg sadu

Weruh wekasing dumados

74

Sabarang tindak tanduk

Tumindake lan sakadaripun

Den ngaksono kasisipaning sesami

Sumimpango ing laku dur

Hardaning budhi kang ngrodon

75

Dadyo weruh iyo dudu

Yeku minongko pandaming kalbu

Ingkang buko ing hijab bullah agaib

Sesengkeran kang sinerung

Dumunung telenging batos

76

Rasaning urip iku

Krono momor pamoring sawujud

Wujudulloh sumrambah ngalam sakalir

Lir manis kalawan madu

Endi arane ing kono

77

Endi manis endi madu

Yen wis biso nuksmeng pasang semu

Pasamoaning hebing kang moho suci

Kasikep ing tyas kacakup

Kasat moto lair batos

78

Ing batin tan keliru

Kedhap kilap liniling ing kalbu

Kang minongko colok celaking Hyang Widhi

Widadaning budhi sadu

Pandak panduking liru nggon

79

Nggoniro mrih tulus

Kalaksitaning reh kang rinuwuh

Nggyoniro mrih wiwal waraning gaib

Paronto lamun tan weruh

Sasmito jatining endhog

80

Putih lan kuningipun

Lamun arso titah

Titah teko mangsul

Dene nora montro montro yen ing lair

Biso aliru wujud

Kadadeyane ing kono

81

Istingaroh tan metu

Lawan istingarah tan lumebu

Dene ing njro wekasane dadi njawi

Rasakno kang tuwajuh

Ojo kongsi kabasturan

82

Karono yen kebanjur

Kajantoko tumekeng saumur

Tanpo tuwas yen tiwaso ing dumadi

Dadi wong ino tan weruh

Dheweke den anggep dhayoh